MAKALA: WAJUA KWAMBA MBWA NAO HUCHEZA DANSI?

UMESHAWAHI kumuona mbwa anacheza dansi? Kama hujawahi kuona ama kusikia basi ukweli ni kwamba mbwa ana uwezo wa kunengua endapo atafundishwa.

Mchezo huu unafahamika kama Musical canine freestyle ama freestyle dance ambao umejaa vitu vingi ambavyo mbwa anafundishwa ikiwemo nidhamu ya mazoezi, mbinu na vionjo vya kunengua.

Katika mchezo huu, mmiliki wa mbwa huwa na uhuru wa kufundisha mbinu mbalimbali za kucheza muziki.

Mchezo huo umewekwa kwenye mfumo wa mashindano na umesambaa katika nchi mbalimbali duniani.

HISTORIA YAKE

Mchezo wa kuwachezesha muziki mbwa ulianza katika miaka ya 1989 katika nchi ya Canada, Uingereza na Marekani kabla ya baadae kuenea hadi nchi ya Uholanzi.

Lengo kubwa lilikuwa ni kutengeneza nidhamu kubwa kwa mbwa wanaowafuga lakini wakaamua kupeleka mbali zaidi na kugeuza kuwa sehemu ya mashindano.

Chama cha kwanza cha muziki wa mbwa kilikuwa ni cha kimataifa na kilianzishwa katika nchi za Uingereza, Colombia na Canada mnamo mwaka 1991.

Baada ya hapo haikuchukua muda sana kwani vyama vingine vilianzishwa katika nchi za Bara la Amerika.

Kila ukanda ulianza kuendeleza mtindo wake huku vyama kutoka nchi za Bara la Marekani vikionekana kung’ara zaidi kwa kuongeza mbinu nyingi zaidi.

Baada ya hapo thamani ya wanyama ikaanza kuonekana kwa nchi za Ulaya na Marekani ambapo walikuwa wanatumiwa ipasavyo kupitia mashindano ya ubunifu wa mavazi na hata kucheza muziki.

AINA ZA DANSI LA MBWA

Zipo aina mbili ambazo mbwa anacheza dansi. Aina ya kwanza ni ile ambayo mbwa anacheza muziki kwa kutumia visigino vyake na aina ya pili ni ile ambayo anacheza kwa kutumia mitindo tofauti tofauti.

AINA YA KWANZA

Katika aina hiyo ya kucheza kwa kisigino, mbwa lazima awe karibu na mkufunzi wake ili aweze kumpa msaada wa kushika miguu yake ya mbele na kumfanya acheze kwa kusimama kama binadamu.

Maana yake ni kwamba anaposimama anakuwa anatumia zaidi visigino vyake.

AINA YA PILI

Katika aina hiyo ambayo hufahamika kama Musical freestyle, mbwa huwa huru kucheza mwenyewe na kutumia mitindo mbalimbali na ubunifu wa kila aina.

Hapo mbwa anaweza kutikisa mkia anavyotaka, kutikisa manyoya yake, kugaa gaa chini na hata kurukaruka.

MASHINDANO

Kwa sasa kuna vyama vingi vya kimataifa vya mchezo huo vimeanzishwa ambavyo ni pamoja na World Canine Freestyle Organization, Canine Freestyle Federation na Musical Dog Sport Association ambacho kipo nchini Marekani.

Kingine kinaitwa Paws 2 Dance Canine Freestyle Organization cha nchini Canada pamoja na Pawfect K9 Freestyle Club cha nchini Japan. 

Kanuni na sheria za mashindano hutofautiana kati ya chama na chama na nchi moja na nyingine.

Hiyo pia inachagizwa na tofauti ya ubunifu unaotumiwa na kila chama na kila nchi.

Mashindano yanaweza kufanyika kwa kuhusisha mbwa mmoja ama kundi la mbwa wakiambatana na wakufunzi wao, na kawaida ni kwamba hata kama kuna mbwa kumi wanashindanishwa, lazima kila mbwa aambatane na mkufunzi wake.

Pia aina ya mashindano hutegemea na chaguo la muziki ambao mbwa anacheza kulingana na jinsi walivyopata mafunzo.

Faida kubwa inayopatikana kwa mashindano haya ni kuingiza kipato kwa nchi husika kwa sababu wapo watu wanaowekeza kwa ajili ya mashindano hayo.

TOFAUTI YA MBWA WA ULAYA NA AFRIKA

Katika nchi za Afrika mnyama mbwa bado thamani yake imekuwa ndogo mno kwa sababu anadharaulika na kuonekana kitu kisicho na maana.

Kinachoonekana ni kwamba Waafrika wengi hawathamini mbwa ikiwemo kutowapa matunzo stahiki kama vile chakula hasa kwa mfugaji na badala yake kinachotegemewa zaidi ni huduma ya ulinzi tu.

Kwa bahati nzuri ama mbaya, mchezo wa dansi kwa mbwa bado haujaingia nchi za Afrika.

Makala haya yameandaliwa na Arone Mpanduka kwa msaada wa mtandao wa Intaneti

Share on Google Plus

About MPANDUKA BLOG

This is a short description in the author block about the author. You edit it by entering text in the "Biographical Info" field in the user admin panel.