TWIGA STARS YAIBUTUA MALAWI, ESTHER CHABURUMA ASTAAFU

Na Arone Mpanduka

Timu ya taifa ya soka la wanawake, Twiga Stars imetakata jioni ya leo baada ya kuifunga Malawi mabao 2-0 kwenye Uwanja wa Azam Complex, Chamazi, Dar es Salaam katika mchezo wa kimataifa wa kirafiki.

Mabao hayo mawili yamefungwa na Asha Rashid Mwalala(dakika ya 43) na Mwanahamisi Omar ‘Gaucho’(dakika ya 82).

Lengo kuu la mchezo huo lilikuwa ni kumfanya kocha Rogasian Kaijage kukitathmini kiwango cha kikosi chake na kujua maendeleo yake licha ya kutokuwa na mashindano yoyote mbele yake.

‘LUNYAMILA’ ASTAAFU RASMI

Dakika 28 hii leo zilitosha kuhitimisha soka la kimataifa la winga wa kushoto Esther Chaburuma maarufu kama Lunyamila aliyecheza kwa muda huo na kisha kwenda kupumzika nje ya uwanja.

‘Lunyamila’ alitumia mchezo huo pia kustaafu rasmi na kuwaaga wachezaji wenzake wa Twiga Stars.

Ni mchezaji aliyeitumikia timu hiyo kwa kipindi kirefu tangu mwaka 2002 ambapo nyota yake ilianza kung’ara.

Jina la Lunyamila alilipata katika miaka hiyo akifananishwa na aliyekuwa winga wa Yanga kwa wakati huo,Edibily Jonas Lunyamila. 

Share on Google Plus

About MPANDUKA BLOG

This is a short description in the author block about the author. You edit it by entering text in the "Biographical Info" field in the user admin panel.